偷斬樹


個人分享
Tagged With: , , , , , , , , ,

「樹木」

香港越嚟越熱,琴日仲錄得有史而嚟香港最熱嘅一日,有成三十六度咁熱。話雖如此香港政府竟然視「百年樹木」如無物,仲鬼鬼鼠鼠咁斬晒上個月係「般咸道」因為「黃色暴雨警告」生效期間而塌樹旁邊剩低嗰四棵「細葉榕」!成日口口聲聲咁講話要綠化,而家隨隨便便就斬咗四棵過百年嘅樹。就算俾你再種返,都要等成百年先得啦!見到得返啲樹根真係心都痛!

「逃避」

今次斬樹真係有少少「斬腳趾避沙蟲」嘅感覺。好地地幾棵樹,無啦啦斬咗佢,就連專家都話修葺下棵樹,等佢唔好太重,咁就冇問題。個幾棵樹真係好靚,點解路政署唔係去鞏固嗰幾棵樹而係斬咗佢?佢哋所謂嘅解釋先至滑稽,話幅牆有新嘅裂痕同因為怕會打風,所以為咗公眾安全先至會決定斬樹喎!真係離晒大普!最重要係點解要夜晚嚟斬樹?唔好話我聽因為避開繁忙時間囉!

「可惜」

香港政府做嘢就係咁,怕孭鑊,做決定前,完全無諗過有冇其他方法。好地地幾棵樹就咁就斬咗佢,人哋明明仲好健康,係你哋冇好好咁保護佢同珍惜佢。一話幾棵樹唔係《古樹名木冊》入面你就話可以斬。有冇咁兒戲呀?連「樹博士」,港大地理系講座教授詹志勇都話,「當時我叫佢唔好斬,最多將樹枝修一修減重,結果斬完見到樹頭好完美,根本冇爛」。