脫晒節

「生活」

過去嗰兩個星期,真係除咗做嘢之外,好少靜靜地咁上網。近期嘅生活係起身,餵奶,換片,少睡,起身,做嘢,睇下老婆同陪月有乜嘢要搞,睇公司電郵,回覆客戶,需要時開會,陪月走咗就做埋佢個份,整翻熱晚餐食,洗碗,烚奶樽,抹下嘢,吸下塵,照顧大仔嘅嘢,再快手快腳寫文,有空檔就快手沖涼,等個仔起身食嘢,再執好晒啲嘢,再做下嘢先瞓覺。

「脫節」

其實除咗夜晚開電視睇新聞之外,個人真係除咗屋企同公司之外,其他嘢嚟刻都唔係好重要!所以有少少脫晒節,有時間都真係做哂自己嘢,尤其係公司嘢。如果唔係就無時間整理老婆同個仔啲嘢。當然好彩嘅係個仔唔係太難湊,希望之後都係咁,可以食完就瞓覺。等我同老婆有少少私人空間做嘢。不過始終深夜係我最安靜最有效率嘅時間。不過屋企突然多咗咁多嘢真係有少少唔慣。

「上網」

而家除咗上載個仔啲相之外,其實都冇乜睇其他嘢。尤其而家啲新聞同資訊太快,睇都未必睇得切。何況要下下緊啲新聞!都唔好話睇手機,忙起上嚟真係乜都唔理。如果你搵我就留低訊息,我之後一有時間就會覆同處理。雖然多個仔都仲適應到,但係始終朝頭早陪月係屋企,其實真係唔慣有個人係屋企走來走去。始終同我哋處理事情有啲唔同,同好似無咗私人空間,不過都係一個多月,希望之後三人世界就會回復郭家大宅嘅生活!

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.