實習中

「新手」

前晚就因為緊張瞓唔到,雖然預咗頂到返屋企就會斷片,但係點知返到屋企瞓咗陣之後就無啦啦彈咗起身。所以都係繼續做嘢,清下啲公司嘢,然後就準備去醫院睇老婆同個仔。點知老婆話佢已經起咗身,而去到醫院嘅時候老婆已經餵緊個仔食奶。最好笑就係食完奶之後佢好開心,擘大眼對住我哋笑。不過今日就扭計要人抱。老婆一抱就笑,真係唔可以種壞佢!

「一日」

好啦今日郭大少出世咗一日啦,雖然一啲人話佢似阿媽,一啲話佢似我。其實使乜話似邊個多啲,事關一定有啲嘢係似我哋。不過佢就真係好得意,有時同你笑。得閒就皺下個眉頭,發炆憎!其實最辛苦嘅都仲係老婆,因為我哋堅持餵全人奶。雖然個仔都好醒目,自己識得食,當然未係好好啦。不過因為佢未係好識得個技巧,所以老婆已經有少少損咗。

「身心」

新手即係新手,拿手唔成世。成日好似有啲嘢未做咁,唔知係唔係心理作用。但係最少而家個仔同老婆仲係醫院,搞晒所有嘢就可以靜靜地做番公司嘢。幾個鐘頭都會見到佢一次,但係每次個樣都好似有少少唔同咁。自己就搞下呢樣搞下個樣,照顧老婆,唔經唔覺都搞到好鬼夜。好彩佢仲係醫院,如果唔係就更大鑊!哈哈!返到屋企就梗係照顧返個大仔,安頓佢嘅起居飮食,真係比多幾個鐘我都唔夠。