白棱鏡

「比賽」

嚟幾日喺網上面除咗政府啲笑話之外,我諗「蒙面歌王」一定係另一個網民嘅熱門話題。本來淨係睇媒體報導呢篇新聞都覺得冇乜嘢,但係越睇就越好笑。個比賽其實係源自一個韓國嘅綜藝節目,而每兩集就由八名隱藏年齡同身分嘅參賽者用佢哋嘅歌聲嚟進行淘汰賽。而《蒙面歌王-中國版》就由江蘇衛視同上海燦星製作攜手合作,由七月十九日開始,每個星期日同星期一播出。

「歌王」

其實我諗好多香港人一聽到「白棱鏡」開口唱第一句歌嘅時候,應該就認得出佢係「李克勤」!無論衣著,身高,髮型,唱功,橫睇掂睇都一定係李克勤呀?真係好好笑,點諗都諗唔明點解巫啟賢可以認唔出佢係李克勤囉!真係瞌埋眼都聽得出係李克勤,佢把聲真係唔難認,仲有佢嘅招牌震音,所以竟然有人話佢係古巨基同許志安,真係無嘢呀?

「節目」

過去幾年,香港歌星都去內地參加歌唱比賽嘅綜藝節目,之前有「中國好聲音」,「我是歌手」到「蒙面歌王」等等。其實除咗錢之外,其實大家有無諗過另一個問題呢?香港本身嘅綜藝節目根本比唔上亞洲其他地方嘅質素。無論台灣,日本,韓國,甚至乎而家中國,都好睇過香港。香港一個咁細嘅市場,點樣可以養得起咁多歌星呢?所以去其他地方發展真係無可厚非,香港樂壇死係有原因,就係香港人唔識珍惜我哋呢班歌手。