咁都得

「襲警」

香港又再一次成為國際笑話,原因係早幾日一名女示威者係之前元朗反水貨客示威嘅時候用佢胸部襲警而被判襲警罪成。當我睇到報道嘅時候真係呆咗,諗極都諗唔明點樣可以用胸部襲警?唔通下次我哋可以用眼神嚟殺死人?而個法官話被告聲稱被非禮但係就無向現場警員投訴,只係投訴俾人係後面推倒,所以認為根本無非禮,而實情係佢用胸部撞啲警察,所以裁定她襲警罪成立。咁都得?

「鉛水」

我真係今時今日先知鉛筆係有鉛。唔好講笑啦,鉛筆係用石墨做㗎!仲有啲專家話叫啲市民最好用水之前最好開水一分鐘,咁邊個俾啲水費?開水喉一分鐘究竟會用幾多水呢?仲有,而家係啲市民日日都係到用緊有問題嘅水,而唔係間唔中用啲有問題嘅水。有事就快啲搞掂佢啦,調查得嚟都蚊瞓。日日講埋晒啲廢話,市民健康先係最緊要。就算驗到無事,都已經驚餐懵啦!

「笑話」

過去一年,香港發生咗咁多事而好多都係猜不通,摸不透!真係一日唔死都有笑話!好多時我只可以用「咁都得」去形容。唔通某啲人當香港人係白痴?咁易呃?又或者出嚟講兩句就可以平息事件?會唔會妙想天開咗啲呢?現今資訊發達,好多嘢好快就可以係網上面搵到。當然有啲資訊係唔準確,但係只要自己用小小時間就可以搵到答案。所以咪玩啦,香港人係嚟啲位其實非常精明!