職業病

「勞損」

好多行業都有職業病,而由細到大我嘅最好朋友就梗係部電腦啦。由好多年前開始由我讀書到開始做設計,其實已經差唔多日日都要對住部電腦。所以你話無職業病就真係呃你!但係自己認為一切由用手提電腦開始!唔知係唔係關個鍵盤事,但係開始有膊頭痛就真係好似由用手提電腦嗰陣時起。但係長時間工作我諗都係原因之一!

「惡化」

好耐之前去做按摩已經有師傅話我係勞損,所以以前係大連做嘢就個個星期都去做按摩同拔罐。當然因為係內地做按摩係好平,所以個個星期做到無問題。但係返咗嚟香港就無辦法,唔捨得去做。到咗最近,個問題好似越來越嚴重,事關幾日前右手嘅手指公側邊開始有麻痺嘅現象。有可能真係無乜理佢,所以嚴重咗都唔知。不過真正原因係乜,我諗都係要睇醫生先知。

「健康」

身體間唔中都會話比我知有啲嘢唔妥。膊頭痛,頸痛,腰痛嚟啲都係平常事,所以就好少理,因為以前為後生就大安旨意。雖然唔可以話三十幾歲已經老,但係以前係咁做做做,十八個鐘,飛來飛去,馬不停蹄,博到盡。而家就知道大鑊,所以應該要收斂一下。而家見到啲後生就識得同佢哋講唔好似住自己細,身體好就唔愛錫自己。健康係最緊要!無健康就無錢,無健康就乜都無!

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.