調整期

「目標」

搞一間公司唔係一件易事,更何況開拓一個新行業係急都急唔嚟。講努力我一定比唔上其他公司嘅老闆,講規模亦都無得比。但係五年就咁過咗去,而跟住五年嘅目標係乜?有時好迷茫,我諗創業同守業就係咁。不過我個目標好簡單,就係由無變有。堅持咗咁多年仲留係香港,除咗因為屋企人之外,就係希望香港有一日可以變成亞洲嘅數據分析中心。

「調整」

其實每日都係咁諗點先可以做好啲,但係現實就係現實,唔係話你想點就點。所以盡可能我都保持平常心去處理每一件事,因為太情緒化會影響好多嘢反而仲衰!當然細公司有個好處就係可以變得快,今日做緊嘅嘢其實同五年前諗嘅真係差好遠。不單止要等市場成熟,仲要係等嘅時候唔好固步自封,不斷向前。今年係另一個關口,所以要調整方向同整理現狀。

「心態」

每個人都有負擔,而我仲可以能夠捱到今日,除咗老婆無限咁支持之外,我諗唔到其他原因。因為過山車上上落落嘅生活唔易過,當然係想自己嘅生活好啲,而無人係後面做後盾真係好難。放棄一件事好易,搵份工過穩定嘅生活亦唔難,唔通有自唔在攞苦嚟辛咩。講真我係有諗過放棄,但係都最後都係重新調整自己嘅心態,同繼續講試多一年,再試多一年。