大頭相


個人分享
Tagged With: , , , , , , , , ,

「頭像」

我其實好少會換我係各大平台嘅大頭相,原因係我好少覺得有一張係啱心水,所以有啲一用就好幾年。如果你見到我真人嘅話,一定係有啲分別,因為好多時都係幾年前影落。當然好多時大家一定要去影大頭相嘅時候就係拎證件,但係大多數嘅時間都係匆匆忙忙係無心理準備嘅情況下去影。所以要一張見得下人嘅就真係少之又少。如果你係街到認到我,咁你都幾犀利!當然朋友例外!

「大頭」

除咗要影證件相之外,好多時一啲講座都會需要大頭相。我成日都搵冇一張啱用,尤其係商業用途果啲。當然我唔會攞証件相啦,事關無一張係出得街。有次想專登影但係就好唔自然。所以到嚟刻我都仲係用緊同一張,希望遲啲有張好啲嘅,咁就可以換一換,等我唔使下下用同一張咁鬼悶。講真大頭,近鏡就真係幾蝦人影,唔係個個影得好睇。所以少不免都係唔好出大頭相!

「換相」

話說星期六我同老婆去咗影大肚相,而今次係我老婆個朋友幫手影。所以可以放底攝影師嚟個角色,而做人肉佈景板。嗰日係不經意嘅情況下影咗張拎住寫咗「佢係男仔」嘅黑板單人相。當睇到老婆個朋友傳送過嚟嗰張相之後,我覺得好正,所以跟住就即刻換咗係 Facebook 用咗幾耐嘅大頭相。點知一張大頭相俾我日日出嘅文章仲引嚟更多人嘅注目。下次都係換張相算把啦!