港心態

「心態」

我相信好多人都應該察覺到香港人有幾個好特別嘅心態。第一,不論係啲乜,有冇市場,樣樣嘢都可以換一餐,炒一餐。第二,做任何嘢都唔好蝕底,人排我排,人買我買,羊群心理。第三,乜都儲一餐,只要係限量嘅就買咗先算,因為限量,所以越難擁有就越要有,要高人一等!第四,做乜嘢都要快過人,最好做第一,就算快你少少都好,型咗先!

「生態」

唔知會唔會係因為香港嘅生活環境,樣樣野都係錢行先,所以有機會賺錢,不論係一個幾毫都好,都要賺盡佢。所以玩具又炒,演唱會飛又炒,當然仲有股票同樓啦!每次見到好多人去排隊買減價嘢都有同一個感覺,呢個就係「啲野唔使錢㗎咩?」真係好似前世無買過嘢咁。最緊要唔好蝕底!買咗先算!有時真係念唔明,嚟啲係啲嘜嘢心態!

「限量」

當然我都會儲嘢,但係除非好好好鐘意我先會儲!好多時見到有啲乜乜乜限量,啲人就會排幾日幾夜去買!但係有咁嘅必要咩?又係念唔明嘅嘢。因為我真係唔鐘意排隊,除咗幫我老婆買啦。有時又見到每當有新嘢出嘅時候,大家又係一窩蜂去買!唔通真係早買早享受咩?就算俾你快一日半日又點?過一兩個月咪又係一街都係,可苦呢?