下雨天

「落雨」

當然呢個世界嘅自然定律係一定會落雨,因為唔落雨就無淡水,而無淡水人係好難生存。但係我真係好憎落雨!除咗濕濕笠笠之外,個天成日灰灰沉沉,令成個人都好似冇乜動力咁,有時連心情都俾天氣影響埋!所以我唔係好適合住係啲見唔到陽光嘅地方。今個星期落足七日,仲要放假都係咁落,想點呢?幾時先雨過天晴呀?

「香港」

其實都留意咗好耐,點解而家啲人擔遮唔睇人?開遮嘅時候又唔睇下身邊嘅環境,整濕晒其他人。真係超級自私!有時佢整濕你一句對唔住都無,但係人哋整濕佢就係咁鬧人有冇攪錯,真係離晒大普!另外就係有啲一落雨就唔識揸車嘅人!次次落大雨都係咁,意外特別多。或者係香港好多司機真係唔慣落雨揸車,啲雨落大小小就騰晒雞。

「節目」

係香港,一落雨真係唔知可以去邊。如果去行商場,一定多人到爆。係街度行又濕嗒嗒又污糟到爆,最慘係好多水氹,啲人睇到唔睇一大腳踩落去,跟住成隻鞋濕晒!係屋企又無乜嘢做,執吓嘢,煮吓嘢,但係有時想睇下電視,點知個個台都係悶到爆。所以落雨真係搞到乜嘢心情都無晒。希望快啲落晒佢,俾返個太陽我呀!

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

 
  • 暖化中全球暖化問係越嚟越嚴重,好多時睇新聞都會用百年一遇嚟形容不同嘅極端天氣。好多人都會覺得全球暖化關自己咩嘢事,甚至乎覺得唔會影響到自己。所以無人會理會我哋生活緊嘅地球其實已經病入膏肓。仲以為有生之年唔會有問題?咁就大錯特錯!如果北極圈嘅氣溫可以達到三十度,咁你諗下啲冰會去晒邊?除咗水位上升之外,海水嘅鹽份降低,導致極端天氣越嚟越頻繁! Click to share on Facebook (Opens in new window)Click [...]
  • 盧凱彤其實睇到新聞嘅時候真係好呀愕然,起初以為自己睇錯,但係當不同嘅媒體都開始報導嘅時候就知道佢真係離開咗。盧凱彤係一個我好欣賞嘅音樂人,好多時睇演唱會都會睇下係唔係佢彈結他。或者大家對佢嘅了解唔深,甚至乎佢唱過啲乜嘢歌或者患有燥鬱症都唔知。有時看似一切都正常,但係有時正常就正正係唔正常。你辛苦了!雖然係一個好難接受嘅事實,但係相信大家都會尊重你嘅決定同永遠記得你! Click to share on Facebook (Opens in new window)Click [...]
  • 三歲了眨下眼郭大少就已經三歲了,當然今日要同佢慶祝啦。一起身同佢去上音樂堂,之後就去咗啟德嘅一間親子餐廳玩,然後再飛入去迪士尼睇巡遊同玩咗陣,因為夜晚同屋企人食飯慶祝。依家啲小朋友真係幸福,不過都係希望佢有一個開心嘅生日啫!見到佢健健康康咁成長,每日燦爛嘅笑容,其實就已經好足夠。不過時間真係過得太快,由一個嬰兒搖身一變,變成一個小朋友! Click to share on Facebook (Opens in new window)Click [...]
  • 團年啦話咁快又一年,不過真係好想雞年快啲過,因為今年真係諸事不順。今年其實真係好大獲,因為之前去咗旅行,返到嚟又忙過不停,所以搞到無乜時間去準備新年嘢。想去買年花,但係睇極都睇唔啱,所以最終都係無買到任何年花。就連每年都會整嘅年糕都未得閒整,都係今日先知買齊所需要嘅材料,所以今晚應該又係要搞到好夜先至有得瞓覺。 Click to share on Facebook (Opens in new window)Click [...]