鼻敏感

「敏感」

由細到大我都有鼻敏感,所以啲空氣一唔好,訓得唔好,或者低氣壓嘅話,個鼻就好似開水喉咁啲鼻水係咁流。有時真係好煩,人哋唔知以為你有流感。係咁打乞嗤,係咁包雲吞。有時喺屋企真係可以消耗一大盒紙巾,擤鼻涕同抹鼻水都整到個鼻損晒。有時真係想切咗個鼻,事關有時真係影響工作,尤其係要去見客講計劃書同講解報告。

「治療」

當然去睇醫生嘅話,醫生一般都係開啲藥俾你,再唔係就建議你用噴劑。不過嚟啲對我嚟講已經完全無用。有啲人話用生理鹽水,但係試過都係一樣。亦有啲人話係抵抗力差,但係我好少病,所以應該唔係。唯一仲未試過就係「天灸療法」,而浸大中醫藥學院嘅一項臨床研究分析顯示,超過五成的鼻敏感患者接受中醫「天灸」療法後,症狀得到改善。

「中醫」

中醫認為,鼻敏感係因為病人體質不佳,肺脾氣虛,所以容易感受風氣而發作。正因如此,好多人係天氣轉變嘅時候,鼻敏感就會發作或者加劇。治療鼻敏感可分為治標和治本兩方面,治標就係紓緩鼻敏感嘅症狀,例如打乞嗤、鼻癢、鼻塞、流鼻水等等,治本就係補肺健脾益氣。所以真係或者需要去認真咁睇吓中醫有無辦法根治鼻敏感!

Leave a Reply

Your email address will not be published. Required fields are marked *