好老師

「電影」

今日同老婆去咗睇「五個小孩的校長」,本來我無乜興趣,不過老婆話好睇話影評好好。所以今日無咩嘢做就走咗去睇嚟套戲。睇完當然係兩回事啦,套戯係改編自真人真事同認真催淚。係呢個香港社會,試問仲有幾多個人會好似「呂校長」咁無私奉獻同堅持教育本身嘅意義?希望嚟套戲做完之後個社會唔會又出現短暫嘅話題而忘記背後嘅理念。

「讀書」

睇到戲入面講述現今香港嘅小朋友因為讀書考試而面對嘅壓力。其實讀書係為咗乜?真係為咗求分數?睇返香港嘅小朋友真係無乜童真!唔係話讀書唔好不過凡事都要有個平衡先得!淨係死讀書而唔識變通咪又係死得!有時話香港嘅學生唔得,其實咪就係香港嘅教育制度嘅結果。讀書叻,考試高分唔代表做嘢叻!

「體會」

自己都有係大學教書,雖然唔係全職,但係我都希望我班學生有好嘅將來。所以將自己所學所識嘅嘢都會用心去教佢哋。不過最希望嘅係改變佢哋嘅學習方法,唔好淨係死背書。所以有啲學生會覺得上我嘅堂會吃力,因為無書讀,無得背!不過出嚟做嘢就係咁,要變通。真係唔係一本天書睇到老,要不斷學習。希望多啲好似呂校長咁嘅老師同小啲怪獸家長啦!不過首先要改變個社會價值觀囉!

Leave a Reply

Your email address will not be published. Required fields are marked *