寄行李

「旅行」

相信好多香港人一年至少去一次旅行!每次去旅行都會或多或少帶行李,當然如果去購物嘅話仲要諗下會程嘅時候點樣帶啲戰利品返香港。除咗拎喼之外,大家一定帶啲孭袋當手提行李。不過好多時咁都唔夠,仲要一袋二袋拎上機,認真變態!有時以為自己返咗內地搭內陸機!又難怪嘅,因為有時啲嘢又真係幾吸引!唔買對唔住自己!

「寄倉」

如果我自己一個人去公幹,一般都唔選擇寄倉。原因好簡單,就係唔想走嘅時候要等行李,一出就走得,唔駛煩!講真等行李係一件好煩嘅事,好多時快則十幾分鐘,慢則要成個鐘!感覺浪費咗好多時間。一般我好少去行街買嘢所以行到比較少,最多因為懶我先會選擇寄倉。另一個原因就係去嘅時間比較長,無計要帶多啲嘢去。

「手提」

當然每個人都會帶手提行李,不過多到客機入面都塞唔落,仲要霸咗人哋啲位就真係有啲過態!有時真係上到機,一啲放手提行李嘅地方都無,真係好無奈。因為我一定帶相機同腳架出去,所以就算腳架可以寄倉,相機都唔得。有時我哋覺得內地遊客跨張,其實香港遊客都好跨張!點都好,去旅行最緊要就係滿載而歸㗎啦!