守業難

「風險」

最近見到大大小小嘅文章或報導都係到講咁次嘅社會運動影響香港經濟,甚至乎有啲小商舖話生意大跌同面臨執笠。事實上,無影響就真係呃你嘅。但係做生意唔係都係咁嘅咩?係有風險同起起跌跌㗎啦!唔通一定順風順水嘅咩?如果連做少幾日或幾個月生意而令到你執笠,咁你真係要認真諗吓應唔應該做生意或者有乜嘢可以解決面前危機。齋抱怨係幫唔到你,因為經唔起風浪嘅生意遲早都會執。除非你玩短炒同潮流嘢,唔係一定唔長久。

「本錢」

好似創業咁,如果你無諗住頭個一,兩年都無利潤嘅話,咁你真係唔好做。因為證明你抱住好快賺到錢同返本嘅心態去創業。如果係啲大連鎖,佢哋大把舖,一間兩間只會影響業績,我唔相信佢哋會執笠。如果今日你話集會影響生意,咁香港 SARS 期間未仲大鑊!講到底大家都係因為自己眼前利益多於一切,又唔諗吓點解依㗎啲租金咁貴,同搵出路嚟開源節流。當然有啲行業靠人流,但係當你未出名同有一班熟客之前你嘅生意未有係一樣,就係未開始賺錢!

「守業」

當風浪嚟到嘅時候,其實同啱啱創業一樣,就係「捱」!時時刻可都要記住「好天收埋落雨柴」,因為「今日唔知聴日事」。你唔知幾時會發生一啲事而影響生意,所以「現金流」係一盤生意好關鍵嘅嘢。當然最好有至少一年嘅流動資金,無嘅話,半年都最起碼。咁你就可以夠時間去改變現狀。係賺少啲,不過做生意嘅朋友,邊個想蝕呀!所以古語有雲「創業難,守業更難」,知點解啦!


Also published on Medium.