一星期

「始末」

由一開始嘅學生罷課其實訴求好簡單,淨係要隻狼坐定定係度面對學生。經過一星期,事前變咗學生被捕,佔中突然開始,佔中變佔鐘,對得把遮嘅市民放催淚彈,佔銅鑼灣同旺角,空城計,搞內訌,扇風點火,黑社會入侵,警察唔捉暴徒到持續搞事。其實隻狼知唔知個活動已經唔係叫「佔中」係一個人民運動,改咗個名叫「遮打革命」呢?經過咁多日,見到個個好和平,香港好多人和諧咗,真係馬照跑,舞照跳。

「沉思」

我其實唔知有乜經濟影響,因為好多人都有返工做嘢,好正常。啲空氣仲好咗添!。可能真係無發生係我身上,所以感覺唔到我亦唔評價。我自己覺得香港舒服咗好多,就算我去銅鑼灣,依然好正常,冇影響到我。不過真係日日新鮮!如果唔係啲警察唔捉啲暴徒就唔會再起變化。真係唔知隻狼想點。所以要好好沉思同分析下一步點做。因為狼係唔會俾安寧你的。

「今後」

真係唔知嚟個「遮打革命」會繼續幾耐。越拖得耐越對香港人不利。但係唔係可以點?就算冇‪「遮打革命」香港亦唔係好得去邊!個個話影響佢,但係租金,樓價係咁升,單一經濟體,淨係識靠搵大陸錢,遲早咪又係死。好似癌症咁,早啲死定遲啲‬死啫!繼續做該做的,去堅持就有一線希望!‬

(Visited 11 times, 1 visits today)

Also published on Medium.